Напис за Соколското друштво во српскиот весник „Правда“ бр. 10414 од 1 ноември 1933 г.: СОКОЛСКАТА ДЕЈНОСТ ВО КОЧАНИ - Соколското друштво во Кочани спаѓа во најактивните соколски друштва во Јужна Србија КОЧАНИ, 31 октомври - (известувач за „Правда“) - Како ретко во кое место во Јужна Србија, во Кочани соколската идеја фатила силен корен. Друштвото со успех веќе со години работи на ширење на соколската идеја меѓу народот и во таа своја работа наидува на целосно разбирање од надлежните. За таа цел, Кочанското соколско друштво одржа и еден курс за лидери („предњаци“) за водачите на селските соколски чети. Курсот успеа над сите очекувања. На курсот имаше дванаесет учесници кои го завршија со успех. За тој успех во прв ред заслугите им припаѓаат на началникот на Соколите, г. Франц Телбан кој со г.г. Станко Обрадовиќ, Милан Шандоров, Артиклов, д-р Николиќ, Петровиќ и со г-ѓа Шандоров ги водеше со успех курсистите. Кочанското соколско друштво е основано во 1922 година, но неговата посветена работа почна дури во 1925. Од тој период Друштвото напредува секој ден. Соколската идеја се повеќе и повеќе се шири меѓу граѓанството. Бројот на членови се зголемува, а меѓу членовите почнува иницијатива за подигање на сопствен Дом. Работата на тоа поле почна веднаш и навистина е и остварен. Во 1930 година завршен е величествен Дом каков што нема во Јужна Србија. Една година подоцна, во 1931 година, Домот заедно со соколското знаме е осветен. На знамето му кумуваше министерот за внатрешни работи г. Жика Лазиќ. Членовите својот Дом го подигнаа од сопствени средства и прилози. Најголем донатор на Друштвото е н.е. Кралот, кој на Друштвото му приложи 25 илјади динари за подигање на Домот. Имајќи такви цврсти основи, Друштвото и понатаму се ширеше, така што сега брои околу 370 членови, со 230 членови вежбачи. Има и три свои Селски соколски чети и тоа во Блатец, Соколарци и Оризари. Располага со своја соколска музика која ја води г. Павле Свирски и со убави справи потребни за еден убав и напреден соколски дом каков што е Домот во Кочани. Ова лето Друштвото приреди многу успешна турнеја по Шумадија, а беше и во Белград каде приреди многу успешен соколски час. На чело на управата на Друштвото се наоѓаат г.г. Благоје Џидровиќ, Стеван Златичанин, Методије Варадиновиќ, Франц Телбан, Стеван Спасиќ, Станоје Обрадовиќ и други. Р.Г. (опис на фотографијата во написот: Од курсот за лидери во Кочани)
